ქეთევან შენგელია დაიბადა 1964 წლის 12 თებერვალს ქალაქ თბილისში. 1987 წელს დაამთავრა თბილისის სახელმწიფო უნივერსიტეტის ფილოლოგიის ფაკულტეტი და ამავე წელს დაიწყო თბილისის 150-ე საშუალო სკოლაში ქართული ენისა და ლიტერატურის მასწავლებლად მუშაობა. 1992 წელს დაიცვა სადოქტორო დისერტაცია ლიტერატურის ისტორიაში თემაზე: ,,ქართველ მწერალთა მიმართებები ვაჟა-ფშაველას შემოქმედებასთან’’. 1989-1993 წლებში იყო ილია ჭავჭავაძის სახელობის ლიტერატურულ-მემორიალური მუზეუმის ექსკურსია-მძღოლი. 1993-2003 წლებში იყო თბილისის სახელმწიფო უნივერსიტეტის მეცნიერ-თანამშრომელი. 2003-2005 წლებში უნივერსიტეტში არსებული კონსტანტინე გამსახურდიას სახელობის კაბინეტის მეცნიერ-თანამშრომელი, ხოლო 2005-2007 წლებში ხელმძღვანელობდა ახალგაზრდა მწერალთა წრეს - ,,ლიტერატურული დახელოვნების სახელოსნო’’. 1985 წლიდან მისი ლექსები, ესეები, მოთხრობები, თარგმანები და წერილები იბეჭდება ლიტერატურულ ჟურნალ-გაზეთებში. მისი ლექსები თარგმნილია რამდენიმე ენაზე. შეტანილია სხვადასხვა ტიპის პოეზიის ანთოლოგიებში და კრებულებში საქართველოსა და უცხოეთში. მისი მოთხრობის მიხედვით ზ. კანდელაკმა დადგა რადიოპიესა "პანდა". გამოცემული აქვს შემდეგი პოეტური კრებულები: ”თოვლივით თეთრი მწუხარება”, ”აკაციის ხეივანი”, ”ცხოვრების სუსხი”, ასევე, ლიტერატურული ნარკვევები და ესეები: ”მზისფერი ქუდი” და ა.შ. ქეთევან შენგელია არის რამდენიმე სამწერლო ასოციაციის, გაერთიანებისა და მწერალთა კავშირის წევრი. 1996-1997 წლებში იყო ლიტერატორთა რესპუბლიკური ცენტრის ლიტერატურულ-მხატვრულ გაზეთ ”რუბიკონის” რედკოლეგიის, 2007 წელს კი ქართული სათვისტომოს მიერ ბარსელონაში დაარსებული ქართულ-ესპანური კულტურული ცენტრის წევრი. მონაწილეობა აქვს მიღებული არაერთ ადგილობრივ და საერთაშორისო კონფერენციასა თუ სიმპოზიუმში. მათ შორის აღსანიშნავია: საფაკულტეტო სამეცნიერო კოფერენცია მიძღვნილი შალვა ნუცუბიძის 120 წლის იუბილესადმი (2008 წელი), თანამედროვე დრამატურგიის პრობლემები თამაზ ჭილაძის ,,არაბეთის სურნელოვანი ბალახების მიხედვით’’ (2008 წელი), II საერთაშორისო სამეცნიერო სიმპოზიუმი: ,,ლიტერატურათმცოდნეობის თანამედროვე პრობლემები’’ (2008 წელი), ,,ამოუცნობის ინტერპრეტაციები დრამატურგიაში - სამუელ ბეკეტის ,,გოდოს მოლოდინში’’ - მორის მეტერლინკის ,,ლურჯი ფრინველი’’ (2008 წელი), ამერიკისმცოდნეობის X ყოველწლიური საერთაშორიო კინფერენცია - ,,ემილი დიკინსონის დიადი და უცნაური სამყარო’’ (2009 წელი), გრიგოლ კიკნაძის დაბადებიდან 100 წლისთავისადმი მიძღვნილი საიუბილეო კოფერენცია – ,,გველისმჭამელის სახისმეტყველებისათვის’’ (2009 წელი). მონაწილეობდა შემდეგ სამეცნიერო პროექტებში: პროექტი: ილია ჭავჭავაძე 170. საიუბილეო კრებული (2007 წელი, ანოტაციების მომზადება), საგნობრივი ტრენინგ-პროგრამა: ,,მეცნიერება მომავლისათვის” (2007-2008 წლები, მასწავლებლებისთვის ინტერაქტივის მასალების მომზადება და მათთვის ინტერაქტივის ჩატარება), სულხან-საბა ორბელიანის ანოტირებული ბიბლიოგრაფიის მომზადება (2008-2009 წლები, ანოტაციების მომზადება). 2006-2014 წლებში მუშაობდა შოთა რუსთაველის ქართული ლიტერატურის ინსტიტუტში მეცნიერ-თანამშრომლად. დღემდე არის ასირიოლოგთა, ბიბლეისტთა და კავკასიოლოგთა საერთაშორისო საზოგადოების წევრი.