research საქართველოსა და კავკასიაში პირველი უნივერსიტეტი - ივანე ჯავახიშვილის სახელობის თბილისის სახელმწიფო უნივერსიტეტი ტრადიციულად ასახავს ქვეყანაში მეცნიერების განვითარების დონეს.

წლების განმავლობაში ჩვენს ქვეყანაში ჩამოყალიბდა საერთაშორისო მნიშვნელობის სამეცნიერო სკოლები, რომლებსაც სათავეში ედგნენ გამოჩენილი ქართველი მეცნიერები – ივანე ჯავახიშვილი, აკაკი შანიძე, გიორგი წერეთელი, ელეფთერ ანდრონიკაშვილი, მათე მირიანაშვილი, ვაგან მამასახლისოვი, გივი ხუციშვილი, ილია ვეკუა, ნიკო მუსხელიშვილი, ვიქტორ კუპრაძე, ივანე ბერიტაშვილი და სხვ. ამ სკოლების ჩამოყალიბებამ და განვითარებამ თსუ რეგიონული და საერთაშორისო მნიშვნელობის მქონე სამეცნიერო ცენტრად აქცია მრავალი მიმართულებით.

თსუ-ში წარმატებით მიმდინარეობს კვლევები აქტუალურ სამეცნიერო საკითხებზე, დამყარებულია კოლაბორაცია მრავალ სამეცნიერო ჯგუფთან cernმსოფლიოს წამყვანი უნივერსიტეტებიდან და სამეცნიერო ცენტრებიდან. საერთაშორისო თანამშრომლობის ფარგლებში განსაკუთრებით აღსანიშნავია უნივერსიტეტელი ფიზიკოსების მონაწილეობა პროექტში ATLAS-ი, რომელიც სრულდება ბირთვული კვლევების ევროპულ ცენტრში (CERN, ჟენევა); ასევე პროექტში FAIR (Facility for Antiproton and Ion Research), რომლის განხორციელებაც დაგეგმილია ქ. დარმშტადის (გერმანია) კვლევათა ცენტრის ბაზაზე. უნდა აღინიშნოს, რომ ექსპერიმენტი ATLAS-ი არის კაცობრიობის ისტორიაში ყველაზე ფართომასშტაბიანი და ძვირადღირებული ექსპერიმენტი, რომლის შედეგებსაც უდიდესი მნიშვნელობა აქვს სამყაროს წარმოქმნისა და აგებულების შესახებ ცოდნის სრულყოფისათვის.
 
თსუ-ს მაღალ სამეცნიერო პოტენციალზე მიუთითებს ის ფაქტი, რომ ფუნდამენტურ მეცნიერებაში მომუშავე უნივერსიტეტის ბევრი კურსდამთავრებული მსოფლიოს წარმატებული უნივერსიტეტებისა და კვლევითი ცენტრების აღიარებული პროფესორია.

საქართველოს ლიდერი კვლევითი უნივერსიტეტი - თბილისის სახელმწიფო უნივერსიტეტის მიზანია, ღირსეული კონკურენცია გაუწიოს სხვა კვლევით ინსტიტუტებსა და ცენტრებს ევროპასა და მსოფლიოში. თავისი საუკუნოვანი არსებობის განმავლობაში მიღწეული მაღალი სტანდარტების შესანარჩუნებლად თსუ ესწრაფვის, იყოს საუკეთესო როგორც კვლევებში, ასევე, განათლების სფეროშიც.

თსუ მკვლევართა მიერ ყოველწლიურად ქვეყნდება 800-ზე მეტი სამეცნიერო ნაშრომი (ტომსონის ბაზის მონაცემებით 2012 წელს 376 სტატია გამოქვეყნდა მაღალრეიტინგულ/იმფაქტ-ფაქტორის მქონე ჟურნალში). დღესდღეობით ხორციელდება 200-ზე მეტი სამეცნიერო პროექტი. 2012 წელს დაცულია 45 სადოქტორო ნაშრომი.

თსუ, როგორც საქართველოს უმაღლესი განათლების მთავარი პროვაიდერი, პასუხისმგებელია ქართველი ინტელექტუალების ახლი თაობის აღზრდაზე.